Monday, March 26, 2012

තනිවීම

ගෞතම බුදුන්වහන්සේ පාපිස්නයක් කෝටි ගනන් වූ පූර්වාරාමයේ වැඩ සිටියේ කෙසේද? ලාභ සත්කාර අර්හත්වයට හා නිවනට අන්තරායකරය වන්නේ කෙසේද? තුන් සිවුරයි පාත්තරෙයි අරන් ඇවිදින දවසට එක වේලක් වැලදූ පමනින් තෘශ්නාවෙන් නිදහස් වන්නේද? හිතින් අල්පේච්ඡ කෙනෙක් බහුභාණ්ඩිකව ඉන්නේ කෙසේද?
-------------------------------------------------------------
´´ස්වාමීනි, ´එකවිහාරි ඒකවිහාරී´ යයි හෙවත් එකලාව වාසය කරන්නේයයි කියනු ලැබේ. ස්වාමීනි, කොපමණකින් වනාහි එකලාව වාසය කරන්නේ වේද? කොපමණකින් දෙවැන්නෙක් සහිතව වාසය කරන්නේ වේද?´´ කියායි.(මිගජාල)......................

´´මිගජාලය, චක්ඛු විඤ්ඤාණයෙන් දතයුතුවූ, ඉෂ්ටවූ, කාන්තවූ, මනවඩන්නාවූ, ප්‍රිය ස්වභාව ඇත්තාවූ, කාමයෙන් යුක්තවූ, ඇලුම් කටයුතුවූ රූපයෝ ඇත්තාහ. ඉදින් මහණතෙම එයට තෘෂ්ණාවෙන් සතුටුවේද, එය ප්‍රියයයි, මනාපයයි කියාද, එහි ගැලී සිටීද, එයට තෘෂ්ණාවෙන් සතුටුවන්නාවූ, එය ප්‍රියයයි, මනාපයයි කියන්නාවූ, එහි ගිලී සිටින්නාවූ ඔහුට තෘෂ්ණා සතුට උපදියි. තෘෂ්ණා සතුට ඇති කල්හි, බලවත් ආශාවෙන් යුක්ත වේ. ඒ බලවත් ආශාව ඇතිකල්හි බැඳීම වේ. මිගජාලය, තෘෂ්ණාවෙන් බැඳුනාවූ මහණතෙම දෙවැන්නෙකු සහිතව වාසය කරන්නේයයි කියනු ලැබේ.(සෝත,ඝාණ,ජිව්හා,කාය,මනො විඤ්ඤාණයෙන් සුත්‍රයෙන් කියව ගන්න)

´´මිගජාලය, මෙසේ වාසය කරන්නාවූද මහණතෙම හුදෙක් වනයෙහි ශබ්ද නැත්තාවූ, ඝෝෂා නැත්තාවූ, වනය ඇසුරුකොට හමන වාතය නැත්තාවූ, මිනිසුන්ගේ රහසිගතවීමට සුදුසුවූ, සැඟවී වාසයට සුදුසුවූ, ඉතා දුරවූ වන සෙනසුන් සේවනය කෙරේද, එතකුදු වුවත් දෙවැන්නකු සහිතව වාසය කරන්නේයයි කියනු ලැබේ. ඊට හේතු කවරේද? ඔහුට තෘෂ්ණාව දෙවැන්න වේ. මොහුගේ ඒ තෘෂ්ණාව ප්‍රහීණ නොවීය. එහෙයින් දෙවැන්නකු සහිතව වාසය කරන්නේයයි කියනු ලැබේ.

´´මිගජාලය, චක්ඛු විඤ්ඤාණයෙන් දතයුතුවූ, ඉෂ්ටවූ, කමනීයවූ, මනවඩන්නාවූ, ප්‍රිය ස්වභාව ඇත්තාවූ, කාමයෙන් යුක්තවූ, ඇලුම් කටයුතුවූ රූපයෝ ඇත්තාහ. ඉදින් මහණ
තෙම එයට තෘෂ්ණාවෙන් සතුටු නොවේද, එය ප්‍රියයයි, මනාපයයි නොකියාද, එහි නොගිලේද, එයට තෘෂ්ණාවෙන් සතුටු නොවන්නාවූ, එය ප්‍රියයයි, මනාපයයි නොකියන්නාවූ, එහි නොගිලුණාවූ ඔහුගේ තෘෂ්ණා සතුට නිරුද්ධ වේ. තෘෂ්ණා සතුට නැති කල්හි, ඇලීම නොවේ. ඇලීම නැතිකල්හි බැඳීම නොවේ. මිගජාලය, තෘෂ්ණා බන්‍ධනයෙන් මිදුනාවූ මහණතෙම එකලාව වාසය කරන්නේයයි කියනු ලැබේ.(සෝත,ඝාණ,ජිව්හා,කාය,මනො විඤ්ඤාණයෙන් සුත්‍රයෙන් කියව ගන්න)

  ´´මිගජාලය, මෙසේ වාසය කරන්නාවූ මහණතෙම හුදෙක් භික්‍ෂූන්ගෙන්, භික්‍ෂුණීන්ගෙන්, උපාසකවරුන්ගෙන්, උපාසිකාවරුන්ගෙන්, රජුන්ගෙන්, රජ මහ ඇමැතියන්ගෙන්, තීත්‍ර්‍ථකයන්ගෙන්, තීත්‍ර්‍ථක ශ්‍රාවකයන්ගෙන් ගැවසීගත්තාවූ ගම්වල වාසය කෙරේද, එතකුදුවුවත් එකලාව වාසය කරන්නේයයි කියනු ලැබේ.


ඊට හේතු කවරේද? තෘෂ්ණාව වනාහි ඔහුගේ දෙවැන්න වේ. ඔහුගේ ඒ තෘෂ්ණාව ප්‍රහීණ වූවාය. එහෙයින් එකලාව වාසය කරන්නේයයි කියනු ලැබේය´´ යයි (වදාළ සේක.)
(සංයුත්ත නිකායේ මිගජාල සුත්‍රය)

යම් භික්ශුවක් හෝ පුද්ගලයෙකු තනිව සිටි පමනින්,පයින් ගියූ පමනින්, වේලක් හැර වේලක් වැලදූ පමනින්, වනයේ වාසය කල පමනින්,පාවහන් නොපැලදූ පමනින්,පාත්තරේක දානය වැලදූ පමනින්, අඩු ඇදුම්/සිවුරු පරිහරනය කල පමනින්,වස්තූන් පාවිච්චි නොකල පමනින්,මුදල් නො ඇල්ලු පමනින්......... ඔහු හෝ ඒ භික්ශුව අල්පේච්ච ජීවිත ගෙවන්නේය,තෘශ්නාව නැතිය, යැයි කියා ඔබ නිගමන දෙන්නේ කෙසේද? ඔහු හෝ ඒ භික්ශුව තුල තෘශ්නාව නැතැයි කියන්නේ කෙසේද?

කෙනෙකු තුල තෘශ්නාව නැතිනම් ඔහු හෝ ඒ භික්ශුව මාලිගාවක සිටියත්,අතු පැලක සිටියත්,තනිව වනයේ සිටියත්. කිනම් ගැටලුවක්ද?
-----------------------------------------------------------------
(මනසින් අත්හැරීමට නොතේරෙන්නන්ට පුංචි පැහැදිලි කිරීමක්)

No comments:

Post a Comment